大自然災禍最具殺傷力之處就是難以預計，即使氣象預測設備再先進，亦無人能準確話你知地震或海嘯幾時幾分到。中港股市股災後，現階段邊有人夠膽估係咪見底，正如大自然災禍般，股市不明朗因素多多，那份未知更令股民心驚驚。
今次內地冧市，凸顯香港股市制度健全。雖然內地散戶鍾意用槓桿炒股，但股海中都有人投資嚴守紀律。上網睇到有位80後上海女股民，喺地鐵站做車站票務員。佢明知閒錢不多，但點都要炒一次，仲視為人生一種歷練。這位80後上海女股民，喺今年3月入市，最厲害一個禮拜贏兩千蚊人仔，相當於剛剛打工嘅薪水。她冇透露喺今次內地股市股災損手，但她每次最多只買一萬蚊人仔，唔會輸身家。
除了一眾股民之外，內地股市大跌亦為貿易夥伴美國添煩添亂。中國作為美國第二大貿易夥伴，僅次於加拿大，對多間靠向中國嘅美國公司唔可以話冇影響，且有機會影響美國公司盈利。
美國科網股面臨內地股市大跌嘅威脅為之最大，例如蘋果公司，今年第二季於大中華市場收入錄得勁升達到71%，佔其整體收入達到16%。現時仍揸住15%阿里巴巴股份嘅雅虎，同樣難以獨善其身。連鎖快餐店家鄉雞同必勝客嘅母公司百勝餐飲集團，當中52%銷售來源為中國。
C+B
本欄逢周一刊出