昔年同事，前華僑日報美術總監，著名漫畫家馬龍來電邀約出席飯局，又是席設陸羽三樓。馬龍與太太方舒眉是陸羽三樓常客，吃晚飯在陸羽並不稀奇，吃飯有乜新意思呢？原來兩公婆夾手夾腳，出版咗一本「趣味學古文」，古文包括中學中國語文科12篇範文；由馬星原插圖（馬星原者，原姓馬也，即馬龍，馬龍本來姓袁，袁崇煥後代），方舒眉加上白話譯文，於是學生讀《孟子．告子上》之魚我所欲也，讀過古文之後，再看馬星原漫畫，方舒眉白話，就更加容易了解、明白孟子究竟講乜嘢。
左丁山一輩讀古文時，全靠背誦，買一份「友聯活葉文選」解讀，已算勤力，現時嘅學生就輕鬆得多咯，讀完教科書，再睇漫畫「趣味學古文」，如果仲話古文艱難，吾無言以對。
問馬龍夫婦點解咁有興趣出版呢類書？馬太話：「原本都係逼出來嘅箒，幫星島校園版寫稿，成日俾編輯追稿，最後就決定結集成書，商務認為有得諗，幫我地出版發行！」馬太係英國蘭開斯特大學文學碩士，係資深編輯，出書當然難唔到佢。佢話學習古文要感謝母校荃灣聖芳濟中學嘅中文老師葉玉樹嘅教導，故此特別邀請葉老師寫序，另有文灼非序言。葉老師此晚亦有出席飯局，只見呢位退休多年嘅老先生肌肉紮實，聲若洪鐘，精神飽滿，唔再教書真係浪費人才，以佢嘅學識，今日啲後輩中文老師難與佢比較噃。如果佢肯替學生補習中文，啲天王實要行開。
講起嚟，葉老師出身珠海書院中文系，師承羅忼烈、羅香林、涂公遂、陳湛銓四位文史大師。後來又考入新亞研究所，跟隨新亞中文系主任，紅學專家潘重規，1972年畢業，真係名師出高徒（如方舒眉、洪清田、林超榮），唔怪得荃灣聖芳濟中學啲中文科咁醒。呢本「趣味學古文」刻意以教育局公佈自2015/16實施，2018年中學文憑試考核之12篇範文為內容，包括（一）論語節錄：論仁、論孝、論君子，（二）孟子：魚我所欲也，（三）莊子逍遙遊（節錄），（四）荀子勸學篇（節錄），（五）廉頗藺相如列傳（節錄），（六）諸葛亮出師表，（七）韓愈師說，（八）柳宗元始得西山宴遊記，（九）范仲淹岳陽樓記，（十）蘇洵六國論，（十一）唐詩三首，（十二）宋詞三首，今日學生未讀過古文，2018年考呢十二篇，點都算係有啲難度，各位家長要諗吓辦法誘導子女去苦讀先至得，睇漫畫學古文，或者會引起興趣啩。