葉翠翠前晚同拍拖10個月嘅建築師兼公司副董事男友周曉東（Raymond）註冊結婚，正式成為人妻，婚宴仲同傳統流程好唔同，事關一對新人唔單止合唱娛賓，仲一齊跳咗part舞。
翠翠噚日話：「我本來一早就諗咗要唱《勇氣》畀surprise老公，點知佢原來又係揀咗呢隻歌，真係到入場嗰一刻先至知，所以大家最後就合唱。」回憶前晚嘅婚宴，翠翠話真係好開心，只係如佢喺婚宴度所講：「最遺憾嘅係媽咪唔喺度，睇唔到我出嫁。」
翠翠又話好多朋友都話估唔到佢結婚咁輕鬆，好似一啲都唔緊張，又話佢前晚一定會喊，但佢就話自己一定唔會，結果佢就贏咗喇！佢笑住話：「要喊都係因為自己講嘅嘢感動到自己，唔係老公講嘅嘢！不過我見到好多人喊，喊得最厲害係做司儀嘅何傲芝。」
練習受傷似骨裂
講到同老公跳舞，翠翠話練咗兩個幾月：「本來仲有啲lifting嘅動作， 但練嗰時我已經受咗傷，痛到以為骨裂，本來痛到想去照X光，但因為太忙最後冇去到。」
撰文：馮仁昭