未來10日，對海洋公園嚟講好重要，只要大熊貓佳佳健健康康活過7月22日，就可以取代大熊貓都都，成為健力士世界紀錄嘅最長壽嘅大熊貓！海洋公園發言人同八方講，已經為此向健力士嗰邊入紙申請緊，難怪外媒都好關注呢件事，路透社都報道佳佳就嚟過生日。園方透露7月底會為公園內4隻大熊貓一齊搞生日會，仲會成個8月都有慶祝活動，一於搞大佢。
等於人類110歲
至於點樣慶祝？海洋公園大賣關子話7月底會公佈，如果到時收到健力士通知接納申請，就喜上加喜。其實佳佳幾多歲呢？佢話官方紀錄36歲，過埋8月就37歲。將大熊貓年齡乘3，就大約等如人類年紀，即係𠵱家好似110歲嘅老人家，變身「大熊貓瑞」。
公園內一共4隻大熊貓，都會喺今年8月生日，到時佳佳37歲、安安30歲、盈盈同樂樂同齡10歲。但其實只有人工環境下出生嘅樂樂和盈盈有準確出生日期，即係2005年8月8日和8月16日，佳佳和安安都係野外拯救返嚟，只知年份、唔知邊日出世。
既然係咁，海洋公園唯有根據大熊貓嘅交配季節，推算多數係8月，於是佢哋都係8月生日。
而之前嘅紀錄保持者、內地大熊貓都都，都係野生拯救返嚟，所以都係當喺8月出世。大熊貓都都1962年喺成都出世，1999年7月22日、未足37歲時去世。
李八方
mailto:[email protected]