啟晴邨嘅鉛水風波，令九龍西嘅立法會女將個個為水狂，各自鬥法睇吓點樣幫忙，而經民聯梁美芬就另闢抽水戰線，仲要名正言順去抽水。
事緣日前大批死魚漂浮海面，身為碧海行動召集人嘅佢噚日同香港公開大學科技學院環境及安全科學系助理講師黃儀強同一班水質研究人員，一齊去咗啟德附近抽水檢驗。黃儀強話當區海水污染物太多，又或者天氣溫差太熱，令魚類未能適應，都唔排除係出現大量死魚嘅原因。
雖然政府話已經清理現場，但梁美芬視察期間依然覺得臭崩崩，佢話仍然有死魚浮喺海面，海水亦好混濁、骯髒，批評政府唔應該忽略西九龍海濱發展，同時話清潔維港水質係跨部門嘅事，必須由政務司司長帶領。唔通大家覺得林鄭好得閒？