咩叫一代法國名將，巫斯義呢個季尾畀晒大家睇，第三場贏完14檔葉廐「軍功」，第四場三班千二米馬上贏埋1檔摩廐「彩福」，兩駒一外一內檔，都係後上及時趕到，難怪有網民大讚阿巫「你係得嘅」！
「彩福」韋達換阿巫即贏，三歲馬第二次上陣，初跑千二米，力壓「共創輝煌」爆12倍冷win開齋，反之後駒騎師羅理雅黑到冇朋友，連續兩場騎外檔馬「明多多」、「共創輝煌」出擊，都畀阿巫食住做阿二。
今場第三名則係初出133倍冷門「僥倖」，第四名由何澤堯騎方廐「星運爵士」拎到，四重彩高達
1,054,737元。
當「彩福」勝出後，今屆冠軍練馬師大局已定，大摩暫以69比61win，領先蔡約翰增至八場頭場，後者餘下七場共出八駒，分佈於其中六場，已無可能追平大摩，大摩第七次做冠軍練馬師。阿蔡今場出新勝馬「飛廉之子」用雷神，全熱門1.2倍，結果有前冇後，輸到三甲不入，只得第五，此駒單是ＷＰ彩池，真金白銀2,000萬投注額就此泡湯。