前立法局主席黃宏發話過，做立法會主席為咗保持中立，係好孤獨同寂寞，但睇嚟現任立法會主席曾鈺成，並唔係咁噃，除咗積極參與建制派嘅討論，佢噚日朝早出席一個香港島婦女聯會嘅電影首映禮時，艷福無邊，由入場至主禮儀式，都被一班女士包圍住，大會仲為咗慶祝曾鈺成獲得大紫荊勳章，送咗盆花畀佢，見到曾主席由頭笑到落尾，就可以知道佢一啲都唔孤寂啦。
同場仲有特首梁振英嘅「至愛」梁唐青儀，曾鈺成同梁太握手時，狀甚盞鬼，好似喜出望外咁，八方現場所見，二人入場時有傾有講，怕且佢哋唔係講緊被偷聽風波啩？梁太以一身閃令藍色連身裙登場，一睇就知佢鍾情藍絲啦！八方問佢點睇有傳梁振英明年1月要落台？佢無回應，係唔知定唔想講呢？