今日早段場次雷神同練馬師蔡約翰的合作馬冇隻曉贏，輸到班粉絲死死吓。偏偏雷神幫賀賢搏殺，卻殺到胡森一場又一場片甲不留。
頭場雷神策賀廐「團圓飛舞」贏胡廐之「精彩時機」後，到第六場四班千八米，又贏賀廐「綠野仙踪」，砌低胡森之「索咖啡」，雷神同賀賢攜手起孖，雷神截至此場今季贏到143win，再將由自己保持之香港騎師單季頭馬紀錄推前一步。
胡森近排已經好努力爭取頭馬，7月1日、5日分別贏「勁勇威龍」及「拼搏小子」，今日卻運氣逆轉，頭場「精彩時機」賽前曾走脫，結果在蔡明紹胯下屈居亞軍；而呢場「索咖啡」落班打王牌加程跑千八米，鞍上人都係蔡明紹，跑落直路中段透出以為贏梗，點知「綠野仙踪」拉士一條氣殺上將佢追過，搞到胡森喺12win原地踏步，注定連續第二季不達標，再收警告信，以後再有任何一季成績肥佬，就要同香港馬迷講拜拜。
今場三、四名都係華將冷門，包括黎海榮「知道勝」及鄭雨滇「耀華盛甲」，四重彩103,823元。