小米總裁林斌早排出席內地中山大學頒授學位儀式，都同大家分享佢23年前炒股「蝕入肉」的經歷。
話說林斌當年在美國工作，曾誤信經紀貼士，用1,000蚊買入一隻股價當時1蚊的股票，雖一度賺成倍，但該股很快就跌到得2仙，仲要玩10合1，由2毫子開始又再插水。結果，林斌第一次炒股成績，就係成千蚊美金蝕到得番幾蚊。
林斌話自己人生最成功嘅投資，係當年瞓身同雷軍搞小米。「如果你真正熱愛一件事，並且真正想清楚之後，投資甚麼都不如投資你自己」。林斌話聽完小米董事長雷軍呢番話，就決定入局。結果佢揸嗰批小米股票，4年之間賬面升值約800倍。講咗一大輪人生道理，原來都係賣花讚花香。