隔牆有耳：
室內彈床樂園彈入港 - 李八方

喺澳洲好受歡迎嘅室內彈床樂園BOUNCE，會喺星期三進軍香港九展，成為本港最大嘅室內彈床樂園。佔地2.2萬平方呎嘅場地、有逾80張彈床，分成7個區域，有適合所有人跳躍嘅自由彈跳區同閃避球競技場，亦有「高手區」，包括彈力十足嘅5x5米巨型彈床Super Tramp、專為練習花式而設嘅Big Bag等。

查實BOUNCE𠵱家喺全球有成10個室內彈床樂園，其中7個喺澳洲，兩個喺南非同杜拜，香港是集團首個亞洲場地。香港區場地經理羅智豪話呀，喺彈床跳躍10分鐘，已經等同跑步30分鐘，建議新手先試玩一粒鐘，慢慢感受彈床嘅彈力、習慣彈跳時嘅離心力後，再逐步提升跳躍度。佢話香港少有結合玩樂同運動嘅室內場地，只要做足安全措施，彈床運動絕對適合一家大小參加。