【拆局】
啟晴邨有食水樣本含鉛量超標，引發社會廣泛關注，但特區政府到昨日才出動政務司司長林鄭月娥統籌處理危機。有政府中人承認，政府前日處理手法未如理想，這與內部分工不無關係，到昨日才急忙升級行動「補鑊」；亦有政界人士質疑特首梁振英連日避談事件，將責任推給林鄭，「要佢掃街又整水喉」。
特首問責局長無影
有官場中人承認，前日由運輸及房屋局常任秘書長應耀康「拆彈」，是低估危機也揀錯人選，「佢（應耀康）係常秘兼房屋署署長，但佢只係睇政策，工程嘅嘢佢根本唔識，係咪應該搵個政府工程師出嚟同佢一齊見記者？」亦有政界人士引述消息，今次涉及最少三個政策局及多個部門，「一出事互相推莊，個個覺得唔關自己事，推推吓好自然推去房屋署頭上，結果得個AO（政務官）常秘見記者，連問責局長都冇」。
直到昨日早上，政府見勢色不妙，才由林鄭月娥領軍「拆彈」，統籌各部門處理危機，但正如一名政界人士說，為何政府遲了一日才意識問題嚴重，梁振英亦未有就事件表態，「CY唔係話民生無小事？點解今次民生有事，佢又唔見人？」笑言或不欲讓民主黨黃碧雲領功。
■記者莫劍弦