林建明（大姐明）一年前因手腳麻痹做了一次徹底的全身檢查，除心肝脾肺腎外，她更要求照腦，報告指大姐明因腰椎勞損致手腳麻痹，同時又發現腦部生了六個血管瘤，右腦一大三小，左腦一大一小。經歷無數風浪的大姐明曾患情緒病，康復後成立心晴行動幫助情緒病人，今次她無意中發現腦內血管瘤，上月尾入院接受「腦動脈瘤微創栓塞術」。大姐明昨日接受本報電話訪問時聲線響亮，她說：「我OK！精神呀！要不停咁去覆診，過幾個月又去再照，好多嘢唔做得，唔可以去啲好影響情緒，好激動嘅活動，又唔可以去人多地方，又驚人撞呀！因為食緊薄血丸，跌低跌親，有啲乜嘢會內出血，𠝹親驚流血不止。」
「煙酒都戒晒」
大姐明認為檢查時意外發現腦血管瘤，是上天的安排，她感恩說：「係呀！其實都好安慰，我有啲親戚朋友都有，係上一輩，都係好後期，中風跌親做咗植物人，我哋嗰時唔識又唔知，呢啲病成因不明，醫療團隊研究緊，但係呢個病唔係話咁罕有，不過女人好似會多啲。」大姐明提醒大家要定期做腦部檢查，因為這個病不會有任何徵兆，她說：「唔係咁罕有（腦血管瘤），但係好多人唔知呀！譬如好彩有照腦，知就要好小心，血管爆就會死！耐不耐要檢查一次腦。」積極正面又充滿使命感的大姐明希望藉今次治療了解更多，日後以過來人身份分享和教育大家。目前大姐明要努力做一個乖乖病人，她說：「係呀！要全心全意，悉心，幾個月來徹底治療，我好有信心，因為我係一個好聽話嘅病人，醫生講我做到十足，連煙酒都戒晒。」
未來半年大姐明要閉關調息謝絕探訪，她更呼籲所有朋友不要探訪，她說：「我一年前已經知個病喇，個個嚟我都要講一輪，我想清靜啲，唔使刻意喇！」
採訪：非非
