今季各騎師中，雷神可以話一人獨大，贏超過140場頭馬，剛周五晚獲頒「最受歡迎騎師」獎，得八萬票遠遠拋離萬七票嘅潘頓。最失敗當然係呂卓賢，屢次犯規季尾被禁上陣，下季更冇牌。而馬壇神童蔡明紹大跌Watt，未計煞科全季只得16Win，成個人謝晒。
不過唔係個個華將都撈唔掂，好似何澤堯就能奮鬥自強，暫時有32Win，遠勝上季22場頭馬，成為新華將一哥；而且佢好有好運，無啦啦有獎攞。話說今季馬會因各見習騎師成績均欠突出，靜雞雞取消歷史悠久之冠軍見習騎師獎，但亦無聲無息低調增設最佳自由身騎師（本地騎師）獎，令早已升大師傅嘅堯仔，如無意外將會喺煞科日上台領獎。
咁都不特止，堯仔最後一戰座騎實力好強，大有機會贏馬賀攞獎。
好似「星運俊爵」，七歲馬今季三捷有大器晚成之感，上仗強如「有心人」都要俯首稱臣，今次角逐曾取三冠八位嘅田草1200米，仲要抽二檔，隨時贏到你唔信。仲有「天合」亦值得重視，上場一班賽亦得季軍，今次降入二班，季初曾於同程1400米火併「美麗之星」、「誰可拼」兩匹級際賽惡馬跑第三，今次對手弱得多，睇嚟最佳本地騎師嘅堯仔，今個馬季可以劃上完美句號。