NBA快艇中鋒D佐敦（DeAndre Jordan）轉會事件餘波未了，原本應承自由身加盟小馬，最終天價留隊，激到小馬班主古賓生蝦咁跳，甚至計劃告上法庭出禁制令，逼到D佐敦要公開道歉。
快艇為咗留人，曾施展「佔領佐敦」行動，包括教練李華士（Doc Rivers）、球隊兩大主力比歷克格芬（Blake Griffin）及基斯保羅（Chris Paul）周三到D佐敦位於侯斯頓嘅家中留守，逼使D佐敦續約先肯走。
古賓自爆周二已去過D佐敦豪宅門口等佢，D佐敦以有約為理由唔蒲頭，最終冇同小馬簽約。古賓計劃告上法庭，告D佐敦違反口頭承諾，快艇管理層嘅禁閉式留人方法，違反NBA球會間協議。如果審訊期間法庭發出出賽禁制令，D佐敦可能冇得落場。D佐敦已經喺個人Twitter公開向古賓及小馬球迷道歉，話古賓係世界最佳班主之一，不過古賓未表示會唔會暫停法律行動。
雖然小馬簽入D佐敦功虧一簣，都總算簽入星級球員，31歲控衞迪朗威廉士（Deron Williams）同網隊達成買斷餘下兩季合約協議，迪朗由原本可收取4,300萬美金，收筍啲拎番2,750萬美元後恢復自由身，並預料同小馬達成兩年總值1,000萬美元合約。
