今季馬王係黑衣巨人「步步友」，佢季內級際賽六連勝，表現充滿星味，當然值得大家致敬。但有一匹低班馬，實力遠不如「步步友」，但同樣值得尊重，就是告達理馬房的「雙龍出海」。
新西蘭馬「雙龍出海」生於2004年10月6日，仲有兩個多月就11歲，係全港最老馬匹，比廐侶「精彩」大五日。喺香港，馬匹三四歲退役亦常見，但「雙龍出海」就跑到十歲，仲要力戰到最後一刻，喺11歲強制退役前，於周日(12日)煞科前仍出賽，真係忠心得無話可說。
「雙龍出海」列陣第七場四班1400米，係佢第72次出賽，此駒至今累積5冠6亞11季，咪睇佢咁老，戰鬥力仲keep得好好，上仗同程若非排11檔，相信不會輸頭位只得季軍。今次只負111磅，當然好跑，而這天亦有動靜，告達理一早到場督操，吼實此駒及另一匹戰馬「金鎗俠」的操練情況，非常緊張，擺明希望「雙龍出海」可以光榮退役。
除咗「雙龍出海」，爭五班1200米的「金鎗俠」亦係機會馬，上仗同程得第四已經試準，告達理如果贏出呢口孖寶，咁就和味咯！