NBA夏天自由轉會窗周四終於正式開啟，唔少球員已經紛紛動筆簽約，落實留隊或者投效新東家。到目前為止，馬刺睇落係大贏家，而佢哋嘅德州鄰居、慘被背叛嘅小馬，就梗係最大輸家啦。
馬刺成功爭取今夏最多人爭嘅阿域治（LaMarcus Aldridge）加盟，而兩位老嫩MVP鄧肯（Tim Duncan）同尼納特（Kawhi Leonard）都續約留隊；咁高興，名宿保雲（Bruce Bowen）就慷慨送出本來為佢榮休咗嘅12號波衫，畀着開呢個號碼嘅阿域治做迎新禮物。東岸冠軍大熱騎士都唔輸蝕嘅，路夫（Kevin Love）發佈簽約相，而「大帝」勒邦占士（LeBron James）經理人亦透露，大帝將會以4,690萬美元（約3.6億港元）人工續約兩年；不過留意番，大帝張約嘅第二年又係球員選項。
CP3「揸旗」工會撐D佐敦
小馬就慘嘞，D佐敦（DeAndre Jordan）出爾反爾，最終決定留喺快艇；喺林書豪嘅爭奪戰，又輸畀有「波神」米高佐敦（Michael Jordan）做生招牌嘅黃蜂，盛傳小馬𠵱家就將目標轉移去網隊控衞迪朗威廉士（Deron Williams）身上。D佐敦嘅爭議成為聯盟鬧劇，球員工會就發出聲明撐佢：「同所有商業合同一樣，張約一日未簽，初步協議都唔可以作實。」不過，大家都知工會主席就係基斯保羅（Chris Paul），咁樣有啲公器私用嘅嫌疑囉。
至於一個夏天走咗四個正選嘅拓荒者，睇嚟已經失去常性，周四開咗張四年總值7,000萬美元嘅頂薪約，想簽入受限制自由身、雷霆中鋒簡達（Enes Kanter）；更令人驚訝嘅係，雷霆話點都會追價喎。
避風留港
效力NBA塘鵝嘅「一眉」安東尼戴維斯（Anthony Davis），噚日因為颱風未有按原定計劃離港，出席「打出名堂」台北站活動。不過，呢位22歲大前鋒照去華仁閉門操練。公關截稿前都冇透露行蹤，球迷話唔定仲有機野生捕獲。
