今個禮拜日（7月12日）煞科，對姚本輝嚟講可以話別具意義，因為練者在當日58歲正日生日，相信佢都希望可以在今季最後一戰食番舖尾糊兼替自己賀壽。其中姚本輝多達十駒上陣，睇番佢今季四次出馬八匹以上，結果三次有馬贏，當中兩次更起孖。另外，翻查2010及2012年都係遲至7月10日後才煞科，結果該兩年姚廐均能贏馬賀壽，今次出馬咁大陣仗，隨時又有生日禮物。
最值得留意係「舖舖旺」及「小龍兒」，前駒在港兩戰均由黎海榮經手，初出第七只輸三乘多，翌仗第四僅負不足兩乘，質新馬越跑越好，今次出王牌兼換上馬房愛將郭能接手，睇得出已有蠢動之意。至於「小龍兒」近四仗獲兩亞一季一殿，上仗於田草1600米只輸俾大熱門「再出奇」跑第二，慶幸不獲加分，仍可留在三班出賽，等番田草1600米上陣，有力贏馬補中。