【搶米娘子大激鬥】澳門賭業猛人、太陽娛樂文化老闆周焯華（洗米華），今年5月兩周抱兩，女友Mandy Lieu及正印洗米嫂陳慧玲（Heidi），分別在20日及30日替他誕下華種，各自生了一個B女，令Mandy Lieu與洗米嫂的「爭米戰」持續激烈。
據知，洗米嫂昨日已跟仔女及老爺等人飛返澳門，而洗米華則仍然留在英國，知情者說：「佢（洗米華）話留喺英國要開會，但洗米嫂都估到佢留喺嗰邊係陪Mandy啦！你估真係儍㗎咩！」
洗米華被消失
去年9月，Mandy Lieu高調戀人夫洗米華後，頻頻被影到與洗米華溫馨外遊，完全當正印無到，有傳洗米華不滿Mandy Lieu在洗米嫂待產時，刻意放料影她在英國產後出院，惟上月24日，本報讀者影到洗米華陪Mandy Lieu在新加坡著名商場ION Orchard血拼，令當時仍在坐月的洗米嫂嬲到爆，日前與洗米華、女兒周梓潼（Virginia）及老爺等人飛英國，出席洗米華大仔周柏豪的畢業禮，仍然全程唔睬老公。
雖然洗米華趁一家人外遊已積極𠱁老婆，但洗米嫂依然未肯原諒，繼日前上載在巴塞隆拿玩Segway電動車自娛短片，昨日再在facebook上載和仔女及老爺等人合照，老公洗米華慘被消失，一家四口的合照只出現在囡囡Virginia的facebook內，但相中可見洗米嫂依然跟老公保持距離，同洗米華隔住一對仔女影相都唔肯企埋一齊。
撰文：李察