【壹週刊】呢日《壹》仔喺機場野生捕獲前大台主播黃紫盈。咦！身邊仲有位高大男士，兩個咬晒耳仔，老老豆豆，係咪出埠拍拖先？有嘢爆有嘢爆喇！
記者：紫盈，同新歡去遊埠呀？好sweet喎！
黃紫盈：估錯晒啦，我哋去拍婚攝呀！
記者：吓！竟然已經發展得咁快，去到談婚論嫁！
黃紫盈：我係話，我要帶呢兩對新人去日本拍婚攝呀！
果然仲有一男兩女企喺隔離，而同紫盈咬耳仔嘅就係其中一位準新人，Gordon！佢細細聲話俾《壹》仔聽，之所以同紫盈咁好傾，原來係度緊點樣預備生日驚喜俾準老婆Debby咋！
最近日圓大跌，日本自然成為好多準新人嘅首選拍海外婚攝嘅地點。《壹週Plus》製作香港首個海外婚攝真人騷，黃紫盈直擊兩對準新人反轉日本影婚紗相。佢哋呢次仲會參加比賽，比拼邊組影得出色影得靚，鹿死誰手就要交俾觀眾決定。事不宜遲，即刻介紹四位主角出場！
有出年年頭擺酒嘅Jackal（27歲）同Becky（26歲）。兩個喺韓國旅行團一見鍾情，平時最鍾意一齊打機同打羽毛球。雖然從事金融業嘅Jackal怕怕醜醜咁，不過準老婆仔Becky做咗四年model，對慣鏡頭，賽前被睇高一線呀！
另外就係今年年尾搞婚宴嘅Gordon（33歲）同Debby。喺鋼材公司做管理嘅穩重男Gordan可以話喺搭車又搭船先追掂呢個老婆，皆因Debby喺台妹，拍拖時過咗澳門做公關。平時兩個最鍾意捐窿捐罅搵嘢食，呢次婚攝比賽，佢哋話會使出殺手鐧。
跟住落嚟嘅幾日，佢哋會兵分兩路進行拍攝，Jackal同Becky會留喺大阪，而Gordan同Debby就會去東京。最後會各自揀出兩張最好嘅婚照，擺上《壹週刊》嘅fb fan page，到時由各位觀眾投票選出the best of the best，參加者有機會贏取價值港幣16,000蚊嘅日本婚攝套餐，記得留意節目啦！
下一集，佢哋一行5人就會飛到去日本，不過正當大家以為一切順利，點知大阪組同攝影師一開會，先發現大家嘅風格好唔同，佢哋會點拆招呢？
服裝提供：ZIZTAR、Pompei 龐蓓
鞋履提供：Benita Fashion、Accurate Sports
手錶提供：ODM
特別鳴謝：La-vie Photography（FB專頁： http://on.fb.me/1JGkkzt ）
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁： http://nextplus.nextmedia.com/