特首梁振英女兒梁齊昕，成日都有好出位言論同行為，不過佢EQ其實幾高，網民點話佢，都冇放喺心上。但昨日齊昕BB突然嚟料，喺Instagram開名斥一位無綫女藝員，原來齊昕BB嘅Email畀人轟炸呀。
話說齊昕昨日先喺IG貼咗張相，話係被一個叫「kenny tse」嘅人炸爆Email，不過再過咗一陣，齊昕就再貼咗張相，指有位叫「王靖怡（Michelle）」嘅女仔，不斷透過Email轟炸佢，而呢位叫Michelle嘅女仔，係大台藝員訓練班畢業生，多數係扮路人甲或妹仔乙。
而我哋向王靖怡求證，佢接受《蘋果》訪問時呼冤：「唉，其實真係冇囉（炸爆電郵），我只係喺新聞見過佢，我根本唔識佢，你哋幫我同齊昕講，唔關我事，唔知係咪我畀人整蠱。（咁IG係咪你本人？）係我自己。」再問到有冇喺齊昕facebook及Instagram留言，所以搞到呢啲事發生？佢話冇，亦冇留過言，再三強調唔識齊昕，只係喺新聞見過佢。