為慶祝Valentino旗艦店開幕，特別在羅馬舉行2015秋冬高訂騷，影后級人馬姬妮芙柏露（Gwyneth Paltrow）、泰達史雲頓（Tilda Swinton）、劉嘉玲、舒淇、日本女優宮澤里惠及韓國女星秀智等，專程飛到當地睇騷。而亞視前高層盛品儒亦帶着老婆蔡一鳳朝聖。
嘉玲就好巴閉，穿上黑色訂做裙，配襯5,000萬Bulgari鑽飾行紅地毯，單是耳環已經有143卡，閃爆全場，宮澤亦拋胸性感亮相。嘉玲透露之前去了參觀莫奈花園：「今次行程太趕，未有時間仔細睇，下次要再去過。」嘉玲又指自己個英文名同意大利有關，「我英文名Carina都係嚟自意大利文，讀訓練班時有兩個老師識意大利文，幫忙改咗Carina呢個名，即係唔錯咁解，發音又似嘉玲，所以一直用。」
舒淇順道出席婚禮
着白色透視喱士裙的舒淇就大讚新裝美不勝收，「好靚、好羅馬！設計好典雅。呢度有好多古蹟，可能地下踩住嘅沙都係古蹟，之前去咗羅馬鬥獸場參觀，但中午太熱，要匿喺酒店休息，之後會飛倫敦參加朋友婚禮。」
採訪：林妙萍
攝影：郭賢興