許誠毅，「史力加之父」，是個土生土長的香港仔，畫公仔畫到殺入荷李活夢工場（DreamWorks），擔任動畫總監兼導演，曾經攞過奧斯卡最佳動畫獎的那位。他，是瘋的，暫別夢一般的高薪厚職，籌備6年，只因心繫香港，堅決回家出品屬於香港人、中國人的動畫。
撰文：盧妹
許誠毅首次執導的動畫加真人電影《捉妖記》，籌備6年，終於在本月16日上映。他說今次拍《捉妖記》是為了圓夢：「喺外國好多年，好想有機會喺動畫生涯入面為呢邊做啲嘢，美國可以做嘅嘢之前都做過，夢工場對我好好，成日問我幾時可以返去。其實今次壓力仲大，美國動畫全世界嘅人會睇，總之多人睇就得啦，今次如果香港人、中國人唔睇就唔知點算，不過今次可以做中國人明就得嘅嘢，好似打麻雀咁，我唔使再解釋咁多，而且我加入打麻雀，阿媽會好開心。」
易角當實習
《捉妖記》有曾志偉、吳君如、湯唯同井柏然合演，而井柏然的角色，原本是柯震東的，可惜柯震東因被列為「封殺劣迹藝人」而被迫易角，對此許誠毅說：「開頭覺得係打擊，不過老闆（安樂影片有限公司總裁江志強）同我講冇乜導演可以當第一次拍係實習，所以補拍要拍得更好。就好似考會考，你做好晒試題，唔知咩原因畀你過幾日重考，咁你啲答案都要攞高分啲啦！呢個係畀我做得更好嘅機會，當然都好多謝湯唯願意幫忙重拍。」
許誠毅直言這個夢經過很多波折，因為缺乏拍攝真人電影的經驗，加上精益求精的個性，他說：「如果你半年前問我幾時可以上，我都答唔到，所以𠵱家覺得好開心、好感恩。」
邊拍邊學嘢
首次做真人加動畫的導演，他直言覺得自己好「白癡」，因為冇經驗。「佢哋問我拍幾耐、點樣拍，我唔識答，我以為畫好晒故事版、分鏡跟住拍就得。我冇拍過真人，冇拍過幾百個人喺現場，於是一路拍一路學，我成日都有問題，不過佢哋都俾我煩得幾開心。開始拍嗰陣真係冇信心，我反應唔到，好似我叫個攝影師可唔可以個鏡頭飛落嚟然後停定，佢問我『導演，真係要咁？我試畀你睇。』之後先知道，真實鏡頭有重量，停嗰陣會搖，電腦唔會有呢個問題，反而令我諗下次做動畫應該加番呢個效果，咁先係真實。」
畫夠才滿意
《捉妖記》內的妖怪幾乎都是許誠毅的手筆，單是男主角「胡巴」至少畫了一千張畫：「畫咗好多，每個都要做test，終於有個似洋葱頭加啲手腳，反應最好。不過都可能係我自己問題，會覺得自己畫得唔夠數，初初畫幾張覺得滿意，過一個月睇番又覺得唔滿意，唔畫夠會覺得對唔住自己。」執着同時好學，是許誠毅最大的優點。
許誠毅又希望憑這個機會，刺激中國、香港製作更多動畫：「停留喺一個位係唔夠好，好似荷李活電影就係不斷求突破，江老闆成日問我夠唔夠好，呢啲嘢睇過未，又用李安壓我，話如果係李安拍會勤力過我，咁樣會令我想做得更好。」
《捉妖記》上映日期：7月16日