要數阿仙奴，甚至英超嘅社交網站達人，門將施捷斯尼真係認咗第二，冇人敢認第一；呢位波蘭門神日前向歌星女友求婚成功，佢就第一時間影相擺上網呃Like。
施捷斯尼（CCC）最經典自拍係今年三月北倫敦打吡，贏咗熱刺後就喺龍門口拎部相機出嚟自拍。佢本身都係衰仔，多次俾人影到食煙，加上表現患得患失，季中冇埋聯賽正選，好彩英足盃仲有得踢，順利幫阿仙奴衞冕。
阿仙奴季初簽入捷克門將施治，CCC又多個競爭對手，不過未開「咧」，都係求埋婚先算，咁嚟到人生最緊張階段，CCC梗係唔會唔記得擺上網啦。唔好以為25歲嘅CCC神高神大，個樣好似冇厘情趣，今次求婚都好有心思，話說周三就係佢未婚妻瑪莉娜（Marina Luczenko）26歲生日，CCC就喺家鄉波蘭華沙包起一間餐廳搞派對，美其名就慶祝未來老婆生日，派對期間就出動求婚，包括T字頭品牌嘅幾卡鑽戒，瑪莉娜又點會唔應承。
靚靚心情隨隊東征
CCC好開心喺個人面書度上載求婚成功大合照，仲話：「我好開心咁宣佈，我美麗嘅瑪莉娜答應嘞。」不過原來事件都有小風波，瑪莉娜原本唔想公開求婚照，但相片已經喺不同媒體流出，搞到瑪莉娜同未來老公最終都公開照片。
CCC就冇講婚期同去邊度蜜月，不過新加坡都有陽光與海灘，都係唔錯選擇，CCC仲可以跟隨阿仙奴大軍去新加坡踢巴克萊英超挑戰盃，實地考察吓都好。阿仙奴就公佈七月15同18兩場挑戰盃大軍名單，門將方面，奧斯賓拿因為參戰美洲盃未歸隊，CCC就會同新加盟嘅施治孭飛，施治呢期就同老婆仔女去西班牙薩丁島度假，心情都唔錯。CCC就喺面書上載一段狂操片，擺明車馬同施治爭正選，新加坡一戰肯定有嘢睇。另外，阿歷斯山齊士就獲額外假期到八月三號，韋碧克就有傷，兩人都唔會去新加坡。
迪米捷利斯爭做老襯
講開結婚，曼城嘅阿根廷中堅迪米捷利斯，下周就會同佢女友伊雲祖蓮娜（Evangelina Anderson）結婚，迪米同女友都算老夫老妻，兩人07年已經拍拖，已經有一子一女，所以今次婚禮唔係太隆重，喺布宜諾斯艾利斯酒店邀請約50位親友出席。伊雲祖蓮娜最出名就係曾經做過《花花公子》嘅女郎。
識睇，一定係睇足英台【英波Live】：
http://soccer.appledaily.com
http://bit.ly/engballlive