教聯會噚日舉行創會40周年酒會，創會會長吳康民（圖）致辭時大爆當年成立教聯會秘聞，話為咗搞呢個會曾進出警務處17次，負責警司不斷留難，盤問佢點解要成立，最終搞近4個月至註冊到，而且唔只港英阻攔佢，連北京都潑冷水，佢話1978年組團去北京，同當時負責港澳工作嘅廖承志講要成立教聯會，對方都對有關諗法「唔太肯定」，仲批評香港左派不應搞小圈子，應該加入其他已成立的教育組織工作，話廖要求「教聯同學協執咗佢，無謂自立門戶」，最終吳康民決定陽奉陰違，只係執咗學協，但保留教聯，教聯先至保存至今40年。
同習總握過三次手
吳康民又講到前日特首梁振英答問大會上，未正面回應是否競逐連任，一向支持梁振英的吳康民，即讚梁振英回應「得體」，「因為呢啲問題言之過早」。
對於國家主席習近平早前曾俊華握手，吳康民即笑指，「習近平同我握過三次手，兩次喺浙江，一次喺北京，係咪我都有機會做特首？」