名校拔萃男書院近日俾人狠批，事緣有劇團前日去學校演出，畀300名中一及中二學生睇。劇團成員唐曉楓噚日在fb撰文，話當日學生唔專心睇不在話下，仲喺台下傾偈喧嘩；到互動環節，既噓上台同學，又推開台下問問題演員支咪。
佢哋喺演出後，向副校反映意見，副校罰全部留堂。之後休息時間，有被罰學生離遠見到佢哋，向佢哋「舉中指、高聲咒罵」。唐話諗到佢哋將來可能躋身上流社會，「成為各領域掌權人時，便有種不寒而慄感覺」。男拔校長鄭基恩回應話，佢已向劇團道歉，學校會承擔責任；佢又話噚日見咗班學生，「他們明白自己過錯，並寫了悔過書」。