特首梁振英噚日帶埋司局長去深圳，同市委書記馬興瑞傾深港合作。單睇陣容，除咗政務司司長林鄭月娥、財政司司長曾俊華都隨行外，佢位新「重臣」、創新及科技諮詢委員會主席楊偉雄亦有隨行，但有立法會議員質疑，CY同馬興瑞使唔使見得咁密？
上京冇得會習總
該心水清立法會議員同八方講，馬興瑞上任市委書記4個月，梁已經同佢會面咗3次，「特首一年去立法會答問大會都係5次左右！見政黨就更加一次起兩次止，就算佢公開落區見香港市民，都冇4個月3次咁密」，該立法會議員笑言，唔知仲以為CY要向馬興瑞「述職」，「內地係傳緊深圳會變直轄市，或者深港合作好重要，但有冇需要見得咁密喎？」
不過CY可以密密見馬興瑞，但係見領導人就未必咁易！佢星期日去北京見領導講一帶一路，但國家主席習近平不在京，冇得「習握手」！有好事之徒同八方講，通常呢類會面，北京精心計算，「要見邊個、唔見邊個，定好晒後先定日子」，所以今次究竟係CY上京，習主席不在所以冇得見？還是等習主席不在，才安排他上京？當中政治訊息完全不同。