股市跌到傻，樓市再吹淡風。200幾萬一間的新居屋都要撻定，二手樓減價盤增加，但市場仍然死寂，是因為肯大幅減價賣樓的業主不多。
地產代理近日的減價口號，只是之前嗌得高，市價本來500萬元，但業主嗌高一成550萬元，現在股災腳軟平30萬益你，真是要講句多謝晒。
這段時間，肯定是買賣雙方鬥智鬥力時間，但最後肯定是業主必勝，都係果句，市場冇盤，樓價跌條毛，有樓在手的業主肯定惡晒，市民只好任由業主宰割。樓市再度陷入拉鋸，地產代理夾在中間最慘，業主企硬，買家觀望，對靠買賣賺取佣金的地產經紀而言，跪單都不掂。
近期生意淡薄的大行經紀陳話，股災又如何，冇咁快有業主劈價，「係都係經紀跳樓先啦」。無錯，經紀無生意，上司日日爆粗問候捽數。可想而知，冇成交確是攞佢哋命，慘到要跳樓。
霸氣業主多的是。經紀王向業主鋤價的下場是畀業主噴到一面屁。荔枝角美孚新邨2期百老匯街29號一個高層放盤，原本叫價768萬元，經紀王鋤佢價，話呢排股市冧、樓市好死，不如減啲，業主就話：「你畀的價太平！唔想賣！賣咗都換唔到嘢！如果萬三蚊一呎就會賣！股市跌關我咩事！我又唔買股票！」。
霸氣業主不單止沒有減價，並說「放900萬」，反價17%，收線前還補多句：「到價先好睇樓」。
政府實施辣招後，二手放盤買一間少一間，加上目前供樓利息只是兩厘多，業主持貨成本便宜，不會輕易割價出售物業。未有辣招炒家市時代，一旦股災，投資者可以在樓市及股市兩邊套現。今日有辣招，用家盤為主，炒燶股要急於套現的「跳樓貨」難求，除非有人肯慘蝕。
記者：朱連峰