阿爺暴力救市無所不用其極。昨滬綜指低開，一度跌逾3%穿咗3400點重要關口，新華社10點鐘左右出新聞稿，話公安部副部長孟慶豐帶隊操上中證監，要查惡意沽空！嚇到股民即刻唔敢沽貨，A股大幅回升！
網上有傳，雖話係針對惡意沽空，但公安會查股民6月以來所有成交紀錄，睇吓有冇沽空，犯下危害國家安全大罪；甚至有傳言話如果你仲夠膽沽貨，有可能被拘留！公安威力無窮，嚇到噚日幾乎所有A股上升，只有兩隻被限制交易的ST股下跌。
情況有幾誇張？因為驚俾公安拉，冇人夠膽沽貨，A股總共得2,800隻，昨日有超過1,200隻A股升停牌，扣除1,500隻停緊牌股份，即係話超過95%可交易股份，通通被逼升停。話時話，如果有人用支槍指住，你估將來仲有幾多人有興趣買股票？
黃尹華