噚日好多打工仔起身第一件事，就係開着電視睇天氣報告，想知幾時掛八號波，預備定提早收工，唔少男觀眾卻有意外收穫，聽新聞聽到暈一暈。
無綫噚日朝早7點半晨早新聞，播出天文台一位男科學主任用圖像講述颱風蓮花走勢，當畫面顯示蓮花路徑穿越香港時，突然有把女聲嘆氣：「唉~~~佢穿過咗香港呀~」到底邊個咁黯然？原來係鄭萃雯（圖），相信當時冇熄咪，令呢位女主播無意間穿崩流露咗心底話。
唔少網民聽完都話呢聲「唉」搞到個心離一離，有人形容「好銷魂呢」，有人為此「唉」而士氣大振，「精精神神上班去」。而喺呢個港股大時代，有網民質疑小花嘆氣，可能係同個股市有關囉。