中大校長沈祖堯也有怕羞時！原來佢兩年前去過甘肅農村參與建橋義務工作，最深刻嘅係當地廁所，因農村「廁所」有啲嘢圍住、有條坑、同埋總有啲雞同豬喺附近，坦言「對住啲雞同豬都有啲怕醜」。
祖堯BB參加嘅係無止橋慈善基金喺內地嘅建橋活動，基金將義工感想結集成書《來自遠方的呼喚》，作者之一嘅祖堯BB喺噚日嘅新書發佈會話，對當地人「食麵過冷河」方式份外難忘，「係喺條河到過（冷河），但條河又唔特別乾淨」。佢又試過化身大力水手，一個人搬一大條木樁，村民都唔信佢係大學校長，問佢「你真的是來自香港的校長嗎？」佢特別記得離開當日，村民送上寫有「建築的是橋樑，留下的是友誼」的揮春，感到好窩心。