仲記得今年初渣打（2888）管理層大地震，CEO冼博德被炒，要搵人補上，市傳另一位博德，即係星展集團總裁高博德，都係熱門人選，點知佢話無人挖佢之餘，對呢個位都無乜興趣，呢件事仲有續集。
一般人會諗，由星展呢間亞洲銀行跳到去渣打呢間全球性銀行，一定好威威豬，點會唔想去？噚日高博德就間接解咗畫，佢喺記者會俾人問到點解唔將星展發展成全球性銀行時，佢笑住咁話：「記唔記得過去4個月，定5個月？瑞信轉咗老總，渣打又轉老總；巴克萊同德銀又轉咗老總，老實講，我幾開心做一間亞洲銀行老總喎！」全場爆笑，原來做全球性銀行CEO係黑仔啲。
不過佢話之前渣打傳會俾人收購，但買完之後要對住近42個國家同埋監管機構，真心覺得唔易。金融海嘯後好多賓架都話方丈小器咗好多，老總唔易做。