今早行政長官答問大會，會議因主席曾鈺成要處理議員就社民連「長毛」梁國雄等人打斷特首梁振英發言而暫停，休會期間，民建聯蔣麗芸與人力陳偉業等人爆發罵戰，整個過程持續約3分鐘。當時梁振英繼續留在會議廳，陳偉業和獨立議員黃毓民繼續高聲罵梁，陳偉業說：「成日喺度傻笑，落台啦你，你搞到國家主席世界蒙羞，(政改表決結果)28比8呀，大比數比否決呀！你去切腹啦。有啲廉恥都下台啦，幾個月前，仲話有信心通過。」
期間梁振英一直站立，望著陳偉業，一言不發。民建聯蔣麗芸即時出言護梁，高聲指「(梁振英)你清垃圾時，就要清埋佢哋(陳偉業、黃毓民)」。黃毓民即回應：「放馬過來，攞機關槍來。」
陳偉業指，當年前特首董建華就是叫時任政務司司長曾蔭權「掃街」，之後自己就落台，並嘲諷民建聯請梁振英搞「掃街」，蔣麗芸回敬：「第一個掃你(陳偉業)！」
陳偉業隨即叫蔣麗芸「番去問你阿爸啦」，指國民黨軍人出身、蔣麗芸父親蔣震後來支持共產黨，「蔣震呀，支持共產黨。蔣麗芸，講嘢！」蔣麗芸即時大怒，一邊走向陳偉業，一邊喊自己父親是抗日戰士。陳偉業指「抗日戰士？抗共戰士呀」。工聯會黃國健和民建聯黃定光幫口斥陳偉業不對：「鬧埋人哋老竇！」陳偉業強調自己其實是高度讚揚蔣震。
蔣麗芸指著陳偉業，「我未搬你老婆同你個女出嚟，你估我唔知你老婆同個女做咩呀」。人民力量陳志全則向黃定光反駁：「佢(陳偉業)話佢(蔣麗芸)老竇乜嘢呀？提老竇都唔得？佢(陳偉業)唔係鬧佢(蔣震)喎。」陳偉業重申，自己讚揚蔣震是愛國工業家。