呢排講開九龍站ICC（環球貿易廣場），好多人都係問排隊上天台條龍尾去到邊，雖然係講笑咁講，但反映到一諗起高樓，大家就即刻諗起ICC。講返正題，大家今年又有機會上去呢個景點喇。
話說新地（016）第4年搞嘅「新地公益垂直跑」，12月6號會比賽，亦都係垂直馬拉松世界巡迴賽最尾嗰個賽站，全程有82層樓、有2,120級樓梯。噚日開始接受報名，11月13日截止。
新地主席郭炳聯，舊年就唔到時間無玩，但據聞今年好想行返轉，佢前年係一口氣行晒全程，用咗半個鐘多啲。以佢年紀嚟計相當好嘢。佢姪仔、集團執董郭基煇（Adam），舊年親自上陣，跑咗22分鐘。據聞Adam同其他管理層今年仲未決定會唔會跑喎。