皇馬、卡斯拿斯同迪基亞呢段三角關係，拖得長過大台啲劇，拉鋸成個月，又拉埋沙治奧拉莫斯落水，但呢兩日終於有新進展，卡斯拿斯決定轉會波圖，皇馬主席佩雷斯更加話迪基亞嘅交易已經搞掂！
有足球網爆料，佩雷斯同半島電視台體育頻道嘅負責人傾偈嗰陣爆響口，話迪基亞嘅轉會已經塵埃落定，相信好快就正式登上「銀河艦隊」。西班牙《馬卡報》亦話，皇馬同曼聯就迪基亞嘅轉會費已傾掂數，個價大概4,000萬歐元（約3.4億港元）。可能迪基亞都知自己喺曼聯嘅日子唔多，禮拜三都把握機會，同安達靴里拉、桑馬達兩位隊友兼老死去睇溫布頓網賽，佢仲成功捕獲費達拿。
貼錢送聖卡斯去波圖
新歡就到，舊愛亦執定包袱，皇馬隊長、上季嘅正選門將卡斯拿斯就喺離隊邊緣，據報皇馬同波圖，已經就最關鍵嘅問題達成協議，皇馬願意貼錢送走「聖卡斯」。34歲嘅卡斯拿斯轉會後嘅年薪冇變，波圖每年出350萬歐元，而皇馬就出400萬歐元。
講到即將落實嘅交易，有單係關曼聯事，意甲球會拖連奴嘅教練雲杜拉證實，右閘達米安將轉投曼聯，「達米安將會為曼聯比賽，佢夢想成真嘞。」達米安嘅轉會費約2,000萬歐元，對於財雄勢大嘅曼聯嚟講，呢筆都係細數目。英國傳媒話，曼聯正加快腳步羅致修咸頓中場舒尼達連，希望趕得切球隊出發去美國前搞掂。
除咗迪基亞，尹佩斯亦會離開曼聯。雖然之前尹佩斯經理人否認過，但英媒又話曼聯同意放人，尹佩斯將會喺周末前轉投費倫巴治，有傳佢已經喺周四做咗體測㖭。
朗尼做第三任老竇
另外，曼聯陣中有喜訊，就係朗尼又做老竇！佢喺fb宣佈，老婆高蓮大肚，佢哋即將迎接第三個小朋友，高蓮話呢胎嘅預產期係出年一月。朗尼同高蓮已經有兩個仔，分別係五歲嘅Kai同兩歲嘅Klay，真係幸福。
識睇，一定係睇足英台【英波Live】：
http://soccer.appledaily.com
http://bit.ly/engballlive