去年夏季，英超有迪馬利亞、阿歷斯山齊士及迪亞高哥斯達等西甲尖兵加盟，粗略計轉會費已高達二億鎊；今夏暫時較沉寂，相信影響力亦較往年細，要等皇馬及巴塞埋班之後，「猛料」自會來。
計影響力，去夏轉會英超嘅西甲兵成功率相當高，最失敗係最貴嘅迪馬利亞；但雲高爾以「天使」一半嘅轉會費，即約2,500萬鎊擸到中場安達靴里拉，衰唔晒。畢爾包人聯賽入波多過前者一倍，有六球，傳送率高踞球會前五名，年僅25，只要身形再紮實一啲，進步空間更大。紅魔下一目標又係皇馬人、中堅沙治奧拉莫斯，轉會費料花逾3,000萬鎊，係咪西甲揀手貨，定另一「天使」，看官自度。
賓施馬、柏度陸續嚟
西甲人，過檔英超成功率，中前場勝後衞；阿仙奴嘅「山神」、車仔嘅「野獸」迪亞高哥斯達同法比加斯，唔再贅述。就算平到好似巴塞舊生保贊，都只係花咗史篤城百多萬鎊，上季只踢咗1,200分鐘有四球進賬，今季進一步適應英倫生活，會有一番功業。今夏，西甲前鋒尖兵肯過英超，所餘無幾，皇馬賓施馬同巴塞柏度洛迪古斯，會係下一位？
相反一眾貴價西甲後衞交唔到貨，車仔嘅菲臘路爾斯同利記嘅艾拔圖摩蘭奴，值逾千萬鎊嘅左閘，連正選都未企穩，熱刺中堅法斯奧，唔係頂級；上次歇冬期，由維拉利爾過阿仙奴嘅千萬鎊中堅基比爾包列斯達，學好英語再評價。被譽為年輕新星嘅右閘查維文基路，由馬體會借去利記兩年等賣斷，一季剛完，紅軍「好行夾唔送」。西甲人去英超，上季利記最失敗。
今夏由西甲轉英超嘅交易，暫時僅過2,000萬鎊。唯一新鮮人係從馬拉加去修咸頓嘅前鋒桑美占美利斯，400多萬鎊貨仔，球迷只能信領隊朗奴高文眼光。至於巴塞青訓出身嘅迪路菲奧，兜兜轉轉，終被愛華頓買斷，重臨故地，呢兩位都係中前場，平平地，風險唔高。
最貴嗰位，暫係熱刺爭贏修咸頓嘅中堅艾達韋列特，終於斬斷同馬體會嘅關係；可踢中後場多個位置，但係上季喺修頓嘅數據，其實非常一般，最突出係每場平均解圍有5.5次，但貴到成1,300萬鎊，卻加入共有六位中堅可用嘅熱刺。領隊普捷天奴，可以放肆到幾時？
波神
電郵：mailto:[email protected]