張晉憑《一代宗師》獲導演王家衛「加持」，戲中馬三角色深入民心，套用《一》片的用語，裏子終於成為面子，他亦得以擺脫「蔡少芬老公」的包袱。9歲習武入隊的張晉，因為沉迷李連杰的《少林寺》電影系列，年少無知以為曉武功就可以做明星。從沒有放棄過成為出色藝人的念頭，李連杰亦沒有「騙」他，憑一身功夫成功轉身，片酬由當龍虎武師的一百幾十暴升到四百萬元。
撰文：何永寧
記得《大時代》的方展博以食杯麵理論，大破陳萬賢的連環船，寓意凡事做到底，終有回報的一日。
張晉那杯麵是自那些年看過李連杰的《少林寺》、《少林小子》開始：「嗰時全中國都興起功夫熱，人人練功夫，我都報名加入武術隊。因為我以為識武功就可以做明星，嗰時得9歲邊知咁多。後來真係有人嚟武術隊搵人拍戲，最後好似係搵咗趙文卓。」
冇樣冇對白
張晉離開武術隊後，入行做茄喱啡、替身，都是為做藝人鋪路，他說：「小寶（爾冬陞）最近有套戲《我是路人甲》講臨時演員，我想講路人甲都叫有個名、有對白，嗰時我做替身冇樣冇對白。」輾轉打滾到接拍王家衛導演的《一代宗師》，獲宗師「加持」，憑戲中馬三片末知性的讀白，一個華麗轉身成為炙手可熱的武打明星：「其實我唔鍾意分動作演員、文藝演員，唔通識打就唔使識演戲，好似馬三一樣要演，唔係單係打。喺《殺破狼II》入面我飾演嘅獄長，一樣喺有血有肉，古仔（古天樂）一句『當年唔係我喺柬埔寨執佢（張晉）返嚟，佢死咗啦』，簡單一句交代咗我戲中出身，有咗𠵱個背景，等我演起嚟更加自然。亦都交代咗點解我咁講究，成日要着西裝打呔、飲靚酒，原來係源於自卑，要靠外表去掩飾出身。所謂武打演員，動作只係輔助，到後來都係要演戲。」
粉絲愛奸角
張晉覺得李連杰之所以受歡迎，除了打得亦因為有演技：「如果淨係靠打，可能拍幾部已經冇人睇，動作演員唔需要演技只係自欺欺人，演員嘅天職就係演戲。」但他就試過太投入角色而不能抽離，有時想到自己身份，演員這個字確實有點沉重，他說：「就如獄長嘅角色太壞，太多陰暗面，呢邊開完工，嗰頭返到屋企又變身做返老竇同老公，其實都好辛苦。」
但能令張晉支持下去的是觀眾的認同，就像今趟在《殺II》的監獄長，雖然是奸角，但不少看過的網民都紛紛留言稱不希望見到這個角色死，演員的魅力就這時候發揮，亦是讓張晉甘之如飴演下去的動力：「感覺係開心嘅，可能同個角色貪靚同華麗，所以受觀眾歡迎，有fans仲同我講睇咗8次，都嚇咗一跳。」
對於粉絲的錯愛，張晉除了感激亦心存慶幸：「有人賞識當然係最好嘅動力同鼓勵，老土啲講，證明自己嘅努力冇白費，要知道呢行付出，未必有回報。唔似體育，我一日（鍛煉）多人8個鐘就一定強過人。」
服飾提供：Giorgio Armani
鞋：Jimmy Choo
化妝：Emma Lee
