鄉議局前主席劉皇發早前順利「傳位」畀囝囝劉業強，部署強仔明年接任立法會鄉議局功能組別議席。唔知點解太子登基後，坊間卻有唔少關於鄉議局副主席張學明要爭位、甚至要中聯辦主任張曉明介入嘅傳聞流出，最後經過一輪暗鬥先有呢個「圓滿結局」。到底係邊個派別人士有意見？唔少鄉紳都話好想知。
西環插手惹不滿
最近又有消息流傳，話中聯辦其實都係希望張學明接任鄉議局主席，希望藉張學明同新界社團聯會嘅關係，進一步控制鄉議會，最後發叔派別反擊，想派西貢北約鄉委會主席李耀斌挑機張學明嘅副主席，先至擺得平張學明，令佢放棄同劉業強爭主席一職，李耀斌最後亦棄選。
孭住民建聯同新界社團聯會嘅張學明，一直都成為唔少鄉紳矛頭所指。據聲言有份策劃「反擊」張學明行動嘅人士話喎，李耀斌原先計劃喺鄉議局副主席選舉報名截止前兩粒鐘先去報名，力求殺張學明一個措手不及，亦令中聯辦「叫都叫唔住」，佢聲稱張學明選前好緊張，不斷四出拉票，最後有感拉票能力不及發叔勢力，擔心輸埋副主席「一鋪清袋」，暗中搵發叔幫手擺平「傳位」爭議。
花生友聽聞有發叔派系人士話喎，鄉議局喺此事後對中聯辦插手局務相當反感，仲警告中聯辦唔好過度干預，否則會適得其反，而劉業強近日力撐侯志強出戰新東補選，就係要表明鄉議局唔會再為中聯辦協調出選嘅新社聯同民建聯人士「抬轎」。
鄉議局反對西環干預？相信唔少政界中人聽完都會失笑。派系眾多嘅鄉議局，近期點解傳言滿天飛？花生友都想問張學明，但佢截稿前冇回覆。
花生友