經過連日「跌完又跌再跌」，A股昨日終於回升，連帶港股亦出現報復性反彈，不過，跟早前高位比較，恒指仍跌去約13%。覆巢之下，豈有完卵，有基金經理跟密西比說，這個星期特別不想回公司，因一回到公司，就要面對慘不忍睹的投資表現。他說：「原本今年表現都唔係咁好，好在有個滬港通炒吓，點知𠵱家有可能仲衰！真係要多謝阿爺喇！」
他續稱：「由於我有買香港股票，唔係一味買A股，呢排中港股災，都只係整體回報由正數變咗做少少倒退，已算還得神落，有啲朋友由於買重A股，結果喺短短兩個星期，回報由升兩至三成，變左跌兩至三成！聽講話，有啲跌幅有四成咁多！真係好恐怖。」
基金回報跌四成多，基金經理「咪要搵定工」？朋友表示，暫時又未聽聞有人已被「抬離現場」，但若果市況再轉壞，不排除會發生任何事情。
他表示：「最恐怖唔係回報變負數，對基金經理嚟講，最恐怖嘅係贖回大增，個基金被人贖回贖得咁上下，就真係唔洗返工㗎喇。」希望今日中港股市不會「彈散」吧。
密西比