港股今日暴跌1,458點，全城聞股色變。馬場上卻有一位騎師可以逆市上升，煞科前頻頻有馬贏，人氣指數爆升，完全跑贏大市，呢位就係老將巫斯義。
阿巫為咗說服牌委會發牌畀佢下季入主文廐做主帥，得以留港發展唔使返法國等運到，呢排放又贏、追又贏，鬥志好到你唔信。好似今晚快活谷一開場五班1650米咁，佢連續第二次騎姚廐「跑贏大市」跑谷草一哩，結果貼欄一放到底，六歲愛爾蘭馬跑到第26場卒之以8.1倍開齋，阿巫亦告連續贏到第六個賽日，期間佢一口氣執咗十場頭馬，表現完全唔似一位年近半百之沙場老將。
今場跑第二係葉廐「大寶庫」，此駒同阿巫亦有關，皆因上個賽日尾場爆冷贏馬之同主廐侶「大寶藏」，正係由阿巫建功。今場第三名是郭能接手韋達停賽換人之「超順暢」；第四名「南華勇將」，四重彩12,722元。