宋朝神宗熙寧年間，大臣王安石變法，旨在改革立國以來積弊。新法原意雖好，但失敗告終，皆因王安石急於求成，推行不得其人，亦不得其法。九百幾年後的今日，中央政府面對股市暴跌，救市心切，藥石亂投，股市越救越跌，新華社承認救市無效（惟該文已被消失）。其實，救市重點，係要穩住人心，挽救信心危機。
在救市總動員之下，人行、中證監、中保監、中金所、中證金、匯金、券商等爭相上陣；昨日財政部承諾不減持所持股票兼增持國有金融股，就連「共和國長子」（國資委管理的央企）都奉命不得減持股票。上市公司自救方式包括停牌、回購，以至響應中證監呼籲，曾於半年內減持股票的大股東及董監高管，斥資增持。
上市公司藉停牌自救，本來無可厚非，但停牌潮卻加劇市場恐慌，昨日滬深兩市共有1,450家上市公司停牌，佔兩市2,776家上市公司半數有凸，令A股變相「半停市」。未有停牌的股份慘被洗倉，投資者擔心遲下逃生無門，趁仲有得沽就沽。滬深兩市昨日共有約1,000隻股份跌停板，滬綜指在國家隊護航下仍插水5.9%，睇嚟呢隊國家隊係跌水隊！
停牌加上跌停板，投資者無法出貨，持有港股者就在港沽貨套現，港股成為中資班資回朝最便利的提款機，被淡友乘勢追擊，恒指急瀉5.8%，收報23516，今年以來升幅全部蒸發（恒指去年收報23605）；H指更瀉6.1%。細價股係內地股災源頭，本港細價股亦出現洗倉潮。大市跌勢全面，技術走勢十分惡劣，即使嚴重超賣反彈力仍薄弱，現階段只宜小注吸納盈利前景好、派息高的優質股或大藍籌。
安碩A50博反彈
A股向來係政策市，政府就係最大莊家。現時救市，上證50隻大藍籌成為主戰場，國家隊昨日開始垂顧深證中小型股份，但主力一定係上證50，皆因此乃孖展盤押重注的對象，亦係期指權重最大的重磅股，只要撐住這50隻大藍籌，就可保住孖展和期指唔爆煲。所以平準基金只會投資藍籌ETF，匯金亦密密吸納。
如果要博反彈，可考慮A50的ETF，我的心水係安碩A50（2823）。A股散戶人心虛怯，將貨源拋售至持貨能力較強的國家隊，日後市場信心將會回穩。不過，入市唔使急，你睇A股上周七折，昨日六六折（滬綜指上周五低見3629，較6月12日高位5178低三成；昨低見3422，較6月12日高位低34%），唔知幾時final sale，總之睇定先啦。
割柑人
本欄逢周四刊登