陳奕迅（Eason）聽日推出新廣東碟《準備中》，噚日喺尖沙嘴搞發佈會，佢着咗件紫色透視衫，雖然加咗件西裝外套，但依然出現透點同露肚臍，同佢平時嘅打扮好唔同。Eason話為咗着件透視裝一直縮肚遮肚臍。大會預備咗蛋糕預祝佢今個月27號嘅41歲生日，另有小朋友上台獻花，Eason仲獲細路女獻吻，冧到震！
有記者問Eason有乜嘢好似碟名咁仲係準備中？佢笑住話：「跑手囉！我從未開始過，跑步對我嚟講負擔好重，雖然身邊有個跑步專家，但未撻着我興趣。」問佢會唔會報名跑2016馬拉松？Eason話：「會，但未報名，唔想公佈晒到時唔去又會點點……等我決定咗先。」咁講係咪即係會去？Eason即閂後門：「講出嚟冇咗動力去完成，唔想講太多。」
苦練做梁漢文嘉賓
Eason話嚟緊會做梁漢文演唱會嘉賓，佢話：「金曲獎我都準備咗兩個月㗎！唔係一星期就有咁自如演出。」講到小豬羅志祥睇完佢演出嚇到喊，Eason話：「佢應該好少去金曲獎舞台我冇見到佢，可能佢咁啱壓力大，唔關我出場前後事。」另外，Eason隻碟將會推出韓國版，對上一次可以推出韓版碟嘅香港歌手，係「哥哥」張國榮，真係巧威威！
撰文：馮仁昭