翠湖花園圍標問題令全港業主關注，會唔會被工程顧問公司掠水，一直跟進圍標議題嘅民主黨總幹事林卓廷，原來夥拍莊榮輝同工黨趙恩來合組咗「反圍標三人組」，已召開多場地區諮詢會，教育市民點樣對付圍標。阿廷話自從翠湖花園一事後，佢哋嘅反圍標諮詢熱線響唔停，居屋、單棟樓、豪宅、山頂獨立屋嘅業主都致電求助，助理接電話接到手軟。
阿廷透露未來幾場反圍標諮詢會場場爆，想出席嘅業主最快要等到8月。而「三人組」家吓最頭痛嘅係要搵個測量師，具名幫小業主估價，證明負責維修嘅「圍標」顧問公司誇大工程金額，佢呼籲測量界嘅良心之士聯絡佢，救救小業主。