球季未有耐開鑼，但下個球季波迷就少咗個聚腳地。喺灣仔做咗21年嘅愛爾蘭酒吧Delaney's，近排正式收到業主信和集團通知唔再續租，下個月要同大家拜拜。Delaney's營運總監Noel Smyth同八方講，做咗咁多年都冇諗過搬走，點知信和唔聲唔聲就拎個舖位公開招租，價高者得，自己輸咗雖然都冇得好怨，但同業主信和合作咁多年，前前後後交咗成億元租金，連少少尊重都冇，實在太殘酷。
Delaney's位於灣仔海德中心嘅旗艦店有好多個「第一」，話說當年有兩個愛爾蘭人嚟香港玩，想飲番杯Guinness黑啤，結果搵極都搵唔到，佢哋心諗香港明明係國際大城市，竟然風行全球嘅愛爾蘭酒吧都冇間，1994年就開咗呢間全港第一間愛爾蘭酒吧，當年仲係香港第一間酒吧引入Guinness黑啤。聽Noel介紹，酒吧裝修跟足都柏林風格，室內全部家具都係愛爾蘭製造再送香港。𠵱家Delaney's發展到喺數碼港同九龍都有分店。
改規矩投標冇情講
Noel話愛爾蘭酒吧最重要係畀顧客有賓至如歸感覺，營造到好似屋企咁舒服。佢話酒吧都好似一個社區，有時會借場畀人學跳舞同搞活動，亦係英超球隊熱刺球迷嘅聚腳地，好多球迷個個星期睇波。
「捱得過沙士，頂得住兩次金融風暴，估唔到最後輸畀業主，係一個恥辱。」Noel話，以前同信和都有商有量，順利續租，但今次改咗規矩，大家要投標，舊租客都冇情講，覺得商業世界除咗講錢，都應該講少少人情味，但似乎唔係人人都咁諗喇。信和發言人就話，雙方試過多次磋商傾約，可惜達成唔到協議，尊重Delaney's嘅商業決定。
李八方
mailto:[email protected]
