早前唔少政府官員同議員，都被攝記大佬影到開會時睇手機嘅內容，而無論係民建聯黃定光睇艷女桌球片、抑或葛珮帆手機顯示立法會主席曾鈺成形容陳偉業「賊來了」嘅短訊，都令公眾大開眼界。
可能唔想再有私密曝光，噚日出席立法會嘅官員各以奇招防止睇手機時內容被影到。食物及衞生局局長高永文就以手機套，邊睇邊遮擋手機內容；商務及經濟發展局局長蘇錦樑就將手機放喺枱底慢慢睇，係就係睇得辛苦啲，但保密度亦高啲。
而曾經喺建制派WhatsApp群組提醒議員要為手機貼防偷窺貼嘅曾鈺成，就佔有坐位背靠牆壁嘅地利，繼續「光明正大」睇手機而又唔使擔心內容外洩。