姚本輝馬房今晚搵老將阿巫開靚個頭，第一場即贏8.1倍「跑贏大市」攞到谷草煞科戰頭彩，跟手兩場佢都做觀眾冇馬出。到第四場三班千二米，姚廐馬上再贏13倍「陀飛輪」，此駒由楊明綸後上一攻而破，四歲英國自購馬第十次在港出賽，終於爆冷開齋，姚本輝跑完頭四場出兩駒贏晒，而呢口姚廐未勝馬孖寶，照乘二串一win，十蚊注都收過千蚊，相當和味。
今場跑落一頭一尾，1號馬搭12號馬，串成71倍冷Q，掛頭牌1號的「帝國勇將」留得比「陀飛輪」更後，在鞍上人郭能胯下姍姍來遲輸個半身位得無威脅之亞軍；跑第三係1檔落飛馬「薑餅人」，貼欄放到直路尾力弱只頂到位置；第四名是「幾叻仔」，四重彩45,929元。
曾兩次試閘後兩個鼻孔流血，以及賽後曾被發現氣管內有大量血液之蔡廐馬「皇子」，馬迷唔怕死，仍捧到2.7倍，12檔起步完全冇料到，大包尾輸35個馬位，大熱門輸死街坊。
至於「陀飛輪」，姚本輝指今仗贏馬有兩個關鍵，一是負輕磅好跑，第二是楊明綸發揮十分出色，騎來冷靜，值得一讚。