今日香港一片愁雲慘霧，費清畀啲相大家睇吓，調劑心情，絲打或部分(十分一?)巴打應該都會開心番少少。呢張就係港鐵小鮮肉。
台灣呢期興小鮮肉(年輕小帥哥)，包括東湖王陽明、北投豆花小鮮肉，以及一堆喺街市、地盤赤膊工作嘅哥哥仔。雖然職業有別，但共通點都係一身肌肉，喺工作期間被偷拍放上網。
呢股風潮都吹到香港內地，可惜香港網友多數只係睇台灣內地嘅相，但近日網上流傳一張相，應該喺本地港鐵車廂影，有個男仔挨喺車廂門旁邊聽緊歌，本來冇乜嘢，但最特別係哥哥仔冇着上衫，露出精壯肌肉。小鮮肉旁若無人咁睇手機，其他乘客都好鎮定，正眼都冇望。(有冇偷望唔知，但最少有一個虎視眈眈，就係偷影個位。)
費清都好奇呢位哥哥做乜要赤裸上身，可惜身邊冇人識佢，而且都唔知究意張相係幾時影嘅。翻查《地下鐵路附例》第28G條規定乘客唔可以穿上不恰當衣服，但好似無明文禁止唔可以赤膊搭車喎。不過咁，附例規定任何人不得對其他乘客造成滋擾及作不雅行為。赤膊係咪滋擾？咁真係要睇吓邊個赤膊喇。