早前因為發表「睇少啲戲、去少啲日本」儲錢上樓論，辣㷫唔少人嘅華人置業主席劉鳴煒MW，噚日出席公開論壇唔怕死，被學生批評有關言論「離地」時再度談及上樓問題。
佢解釋當日有關言論只想講明，「太古城即使跌到100萬，都要儲首期」，話只要讀過經濟學，就知儲錢喺外國亦可叫做「延誤即刻想做嘅消費」，強調訪問中話明咁做「唔包生仔」，暗示有人誤解或曲解。佢話今次事件最大教訓，係自己嘅職業同背景令唔少人即時諗起好多同有錢有關嘅標籤，「（因而令）有人唔啱聽，呢個有啲可惜，但𠵱家啲網民網媒風氣就係咁」。
而同學生交流後，佢話知道唔係每個年輕人都想買樓，認為如果有人想買樓嘅話，𠵱家樓市「其實係貴到差唔多冇可能喺今日嘅環境同條件下買」。