香港青年協會賽馬會「萬馬奔騰．萬眾一心」裝置藝術展及教育計劃，繼4月時喺沙田馬場平台及荃灣愉景新城展出、首度以徐悲鴻著名水墨畫《六駿圖》為藍本嘅立體創作後，嶄新嘅《六駿圖》裝置藝術周一起跑入機場二號客運大樓，其中兩匹奔馬仲要係全新創作，分別由機管局行政總裁林天福及年輕設計師李楚洳，以及機管局藝術及文化諮詢委員會主席馮婉眉、年輕設計師何昆尚及何昆承兄弟合作而成。
《六駿圖》係徐悲鴻1942年嘅作品，6匹駿馬代表徐悲鴻同佢嘅好朋友，勉勵大家喺國家危難當前時要勇往直前、迎難而上。呢次展覽獲徐悲鴻藝術委員會授權，而除身高6呎駿馬，現場仲有由青年製作嘅1,500個立體環保紙模，一齊馳騁喺高低起伏嘅山巒。展品周一起至7月19日、以及8月7日至9月30日喺機場展出。