自由黨揚言要招募「神一般的隊友」，噚晚搞咗名為「自由黨 等埋你」嘅招新聚會，有逾百人參加，當中有人即場填表入黨，主席鍾國斌話今年上半年黨員人數顯著增加，幾乎番一番。
8位數字入市
自由黨中人覺得咁多人入黨係因為「田少效應」，所以噚晚專登搵田北俊親自招新人，八方發現，富商趙世曾嘅囝囝趙式浩都在場，原來佢幾個月前就入咗黨，但唔肯多講點解同自由黨情投意合；而成功將紐約超人氣蛋糕店Lady M引入香港嘅老闆娘吳丹原來2012年已經入黨，仲話當年同老公喺紐約成日去Lady M，算係定情之地，所以花唔少時間傾掂喺香港開業。
而田少噚晚除咗講政治，喺呢個大時代點可以唔講股票？佢話呢兩日趁跌市大量入貨，買股票其實由田太負責，但噚日見個市咁都忍唔住打畀老婆叫佢入多啲，直言「再跌可以再買，以一個執平嘢嘅態度囉」，仲話自己搞開地產，股票唔係專家，買恒指就最簡單，唔透露確實掃咗幾多貨，只係話有8位數字，聽到唔少在場人士嚇一跳。