建制派WhatsApp群組大曝光事件，似乎隨住中聯辦主任張曉明一句「到此為止」而到此為止，但花生友理解到嘅卻係：捉鬼行動之所以完結，係因為鬼已捉，正如民建聯鍾樹根都透露，呢位鍾意着短褲嘅建制派議員最近乖咗。最近亦有建制派議員私下做偵探，剖析點解佢會覺得呢位短褲議員就係洩密者。
專業資格隨時受影響
洩密者身份，花生友姑隱其名，但心中有數嘅大家或者都知道佢係一位專業人士。有建制派議員話，可能因為短褲議員平時牙尖嘴利、對答如流，但早輪喺洩密事件風頭火勢其間，卻即時功力大減，回應事件嗰陣變得口窒窒，所以俾人覺得係內鬼。建制派議員提醒花生友，專業人士有專業人士嘅操守，若然佢哋公開講大話，隨時會俾人向相關專業團體投訴，分分鐘連專業資格都受影響，試問短褲議員點會唔有所避忌。
呢位建制派議員亦提到，短褲議員有份參與嘅部份委員會，不時發生漏料情況，肯肯定係短褲議員嘅好事喎。花生友聽過另一個建制派議員私下話，怕且以後有乜漏料風波，短褲議員都會係嫌疑犯，私下都話佢好慘，呢啲可能叫一失足成千古恨。
唔知係咪眼見建制派因為呢件事，以後合作上有啲避忌，花生友聽聞經民聯石禮謙今晚自掏腰包、加上自由黨田北俊豪出一支巨型紅酒，請建制派食飯飲酒，當係團結一下大家。
花生友